پي ٽي آءِ کي اهڙن ملڪن کان مدد ملي رهي آهي جيڪي پاڪستان کي ترقي ڪندي ڏسڻ نٿا چاهين:صوبائي وزير

ڪراچي (اسٽاف رپورٽر) صوبائي وزيرن سعيد غني ۽ سيد ناصر حسين شاهه چيو آهي ته پي ٽي آءِ کي اهڙن ملڪن کان مدد ملي رهي آهي جيڪي پاڪستان کي ترقي ڪندي ڏسڻ نٿا چاهين. معزز عدالت کي پي ٽي آءِ جي پرڏيهي فنڊنگ ڪيس تي ڌيان ڏيڻ گهرجي، جيڪو ڪيترن سالن کان التوا جو شڪار آهي. پي ٽي آءِ ۾ هڪ انتشار پسند ٽولو شامل آهي. اسان چاهيون ٿا ته پي ٽي آءِ وارا پرامن رهندي سياست ڪن. اهڙن خيالن جو اظهار هنن اڱاري تي ٽن ڏينهن جي پاڪ واٽر اينڊ انرجِي ايڪسپو 2024 جي افتتاحي تقريب ۾ ڪيو. ان موقعي تي پرائم ايوينٽ ڊائريڪٽر ڪامـران عباسي، اختر شاهين رند ۽ ٻيا پڻ ساڻن گڏ هئا. صوبائي وزيرن نمائش ۾ لڳايل 150 کان وڌيڪ ملڪي ۽ غير ملڪي اسٽالن جو دورو ڪيو ۽ موجود شين بابت بريفنگ ورتي. ميڊيا سان ڳالهائيندي سيد ناصر حسين شاهه چيو ته اها نمائش هميشه کان ڪامياب رهي آهي ۽ هر سال هزارين ماڻهو ان جو حصو بڻجن ٿا. سعيد غني چيو ته گذريل 8 سالن کان هي نمائش ٿي رهي آهي، جيڪا پاڻي کي محفوظ ۽ قابل استعمال بڻائڻ لاءِ آگاهي فراهم ڪري ٿي. سعيد غني چيو ته انرجِي ۽ پاڻي ٻه اهم شعبا آهن جن کي محفوظ ڪرڻ لاءِ دنيا ۾ نوان طريقا ايجاد ڪيا پيا وڃن. سعيد غني چيو ته پي ٽي آءِ کي اهڙن ملڪن کان مدد ملي رهي آهي، جيڪي پاڪستان کي ترقي ڪندي ڏسڻ نٿا چاهين. هن عدالت کان مطالبو ڪيو ته پرڏيهي فنڊنگ ڪيس کي سنجيدگي سان ورتو وڃي. سيد ناصر حسين شاهه چيو ته پي ٽي آءِ ۾ انتشار پيدا ڪندڙ عناصر موجود آهن، جيڪي ملڪ ۾ انارڪي پکيڙڻ چاهين ٿا. وزيرن نمائش ۾ شرڪت ڪندڙ غير ملڪي ڪمپنين جي جديد مشينري ۽ ٽيڪنالاجي جي واکاڻ ڪئي ۽ انهن کي پاڪستان ۾ سيڙپڪاري جي دعوت ڏني. نمائش ۾ 175 اسٽالن تي 60 کان وڌيڪ نمائشن ڪندڙ شامل هئا، جن ۾ چين، ترڪي، آمريڪا ۽ ٻين ملڪن جون ڪمپنيون موجود هيون.